Chuala Séamus Ennis trácht an chéad uair ar Cholm Ó Caodháin deireadh Lúnasa 1942 nuair a luadh ainm Choilm leis mar fhonnadóir maith ó Ghlinsce, ó thuaidh ó Charna. Rinne sé iarracht mí na Nollag 1942 a dhul fhad leis ach níor éirigh leis, de bharr droch aimsir. Ach ar an 25 Bealtaine bhuail Séamus Ennis le Colm Ó Caodháin agus fuair sé amach go raibh cuimse go deo port agus amhrán aige, agus an port seo ina measc. Tá dlúthbhaint ag an gcéad chuid den phort seo leis an gcéad chuid de ‘Rory O’Moore’ faoi mar a thaifead Mary Ellen Conlon é i Nua Eabhrac in 1923 ar lipéad Gennet. Ba deirfiúr í Mary Ellen, ó Bhaile an Mhuillinn i dtuaisceart Chontae na Gaillimhe, le P.J. Conlon. Bhí P.J. ar dhuine dóibh sin a thaifead ceirnín tráchtála le ceol mileoidean de chuid na hÉireann. Ba é Samuel Lover, ó Bhaile Átha Cliath a chum ‘Rory O’Moore’ mar chuid de cheoldráma grinn in 1837. Foilsíodh mar phort é in Ryan’s Mammoth Collection (lch. 120) agus in O’Neill’s Dance Music of Ireland (Uimh. 116) le O’Neill.